सिजन खबर एलन मस्क ले १० वर्षभित्र चन्द्रमामा ‘आफैंमा निर्भर शहर’ बनाउने योजना सार्वजनिक गरेका छन्। SpaceX का प्रमुखसमेत रहेका मस्कले मंगल ग्रहभन्दा चन्द्रमामा छिटो र सहज रूपमा मानव बस्ती स्थापना गर्न सकिने तर्क दिएका छन्। मंगल ग्रहमा यात्रा गर्न ग्रहहरूको विशेष अवस्थाको प्रतीक्षा गर्नुपर्ने र करिब ६ महिना लाग्ने भए पनि चन्द्रमामा हरेक १० दिनमा प्रक्षेपण सम्भव हुने र यात्रा मात्र २ दिनको हुने उनले बताएका छन्। चन्द्रमामा उपलब्ध स्रोत–साधन प्रयोग गरी अक्सिजन, पानी र निर्माण सामग्री उत्पादन गर्दै विस्तारै आत्मनिर्भर बस्ती विकास गर्ने उनको अवधारणा छ, यद्यपि यसको विस्तृत औपचारिक खाका सार्वजनिक गरिएको छैन।
विज्ञहरूका अनुसार चन्द्रमामा सानो आधार शिविर स्थापना गरी सीमित अक्सिजन र पानी उत्पादन गर्नु सम्भव देखिए पनि पूर्ण आत्मनिर्भर शहर निर्माण दीर्घकालीन र चुनौतीपूर्ण लक्ष्य हो। अत्यधिक तापक्रम, धुलो, कम गुरुत्वाकर्षण र प्रविधिको विश्वसनीयता मुख्य चुनौतीका रूपमा रहेका छन्। त्यसैबीच NASA ले पनि यस दशकभित्र मानवलाई पुनः चन्द्रमामा पठाउने तयारी गरिरहेको छ, जसले अन्तरिक्ष प्रतिस्पर्धा बढाएको छ। मस्कले अन्तरिक्षमा डेटा सेन्टर र एआई पूर्वाधार विस्तार गर्ने महत्वाकांक्षी योजना समेत अघि सारेका छन्, तर प्राविधिक र आर्थिक जटिलताबारे विशेषज्ञहरूले सतर्कता व्यक्त गरेका छन्।
