सिजन खबर माघ २८ सन् २०१४ मा बंगलादेशमा भएको आईसीसी टी–२० विश्वकपमार्फत नेपालले विश्वकप डेब्यु गर्दै हङकङ र अफगानिस्तानलाई हराएर शानदार सुरुआत गरेको थियो । तर नेटरनरेटका कारण सुपर १२ मा पुग्न नसकेपछि पनि नेपालले विश्व क्रिकेटमा प्रभाव छाडेको थियो । त्यसयता नेपालले दुईपटक टी–२० विश्वकप खेले पनि २०१४ मार्च २० मा अफगानिस्तानलाई हराएपछि कुनै खेल जित्न सकेको छैन । २०२४ को विश्वकपमा तीन खेल हार्दा एक खेल वर्षाले रद्द भयो । हाल भारत र श्रीलंकामा भइरहेको विश्वकपमा इंग्ल्याण्डसँग पहिलो खेलमा ४ रनले पराजित भए पनि नेपालले उत्कृष्ट प्रदर्शन गर्दै प्रशंसा बटुलेको छ ।
अब नेपालले समूह सी अन्तर्गत दोस्रो खेल इटलीसँग खेल्दै १२ वर्षपछि विश्वकप जितको खडेरी तोड्ने लक्ष्य राखेको छ । विश्व वरियतामा २७औँ स्थानमा रहेको इटली यस संस्करणको डेब्यु टोली हो । टी–२० आईमा नेपाल र इटलीबीच पहिलो भेट हुन लागेको हो, यद्यपि ५० ओभरको खेलमा १३ वर्षअघि नेपालले इटलीलाई ८ विकेटले पराजित गरेको थियो । बर्मुडामा भएको उक्त प्रतियोगितामा नेपालले ‘मिराकल अफ बर्मुडा’ गर्दै उपाधि जितेको स्मरणीय इतिहास छ । अहिले पनि समर्थकहरूको बलियो साथ र पहिलो खेलको आत्मविश्वाससँगै नेपाल जित निकाल्ने लक्ष्यमा रहेको छ ।
