सिजन खबर माघ २८ काराकास । भेनेजुएलाको राष्ट्रिय सभाका अध्यक्ष जर्ज रोड्रिगेजले तत्काल नयाँ राष्ट्रपति निर्वाचन नहुने स्पष्ट पारेका छन्। न्यूजम्याक्ससँगको अन्तर्वार्तामा उनले हालको प्राथमिकता चुनाव नभई देशमा स्थिरता कायम गर्नु र न्यायालय, सुरक्षा निकाय, प्रशासन तथा संवैधानिक संरचनाको पुनःसंस्थानीकरण रहेको बताए। उनका अनुसार पूर्ण संस्थागत स्थायित्व र राष्ट्रिय सहमति बिना चुनावले थप ध्रुवीकरण मात्र निम्त्याउनेछ।
भेनेजुएलामा राष्ट्रपति कार्यकाल छ वर्षको हुन्छ र पछिल्लो चुनाव २०२४ मा भएको थियो, जसलाई विपक्षी र अन्तर्राष्ट्रिय समुदायले विवादास्पद बताएका थिए। जनवरी ३ मा अमेरिकी सेनाले राष्ट्रपति निकोलास मादुरोलाई पक्राउ गरेपछि सर्वोच्च अदालतले उपराष्ट्रपति डेल्सी रोड्रिगेजलाई अन्तरिम राष्ट्रपति नियुक्त गरेको थियो। सरकारले नयाँ चुनावअघि विपक्षीसँग संवाद र मेलमिलापमा जोड दिएको छ भने केही राजनीतिक बन्दी रिहा तथा आममाफीसम्बन्धी कानुन अघि बढाएको छ, यद्यपि विपक्षले यसलाई अपर्याप्त बताएको छ।
