मधेसको माहोल हेर्दा कांग्रेसले चुनाव जित्छ- सभापति थापा

सिजन खबर माघ २७ कांग्रेस सभापति थापाले मधेसमा कांग्रेसले चुनाव जित्ने वातावरण बनिसकेको बताएका छन्। सिराहाको धनगढीमाइ नगरपालिका–बुद्धनगरमा आयोजित कार्यक्रममा उनले स्थानीय माहोलले कांग्रेसको जित सुनिश्चित गर्ने संकेत गरेको उल्लेख गरे। मतदाताले विश्वास गरेर आफूलाई बोलाएको भन्दै उनले यहाँको उत्साह देख्दा कांग्रेसले जित्ने आशा पलाएको बताए। उनले चुनाव नजिकिँदै आएको उल्लेख गर्दै कांग्रेस चुनावका लागि तयार रहेको, नयाँ नेतृत्व चयन गर्न आतुर रहेको धारणा राखे। “भोट तपाईंहरूको हातमा छ, जिताएर पठाउनुहुन्छ भन्ने विश्वास छ,” भन्दै उनले मतदातासँग समर्थनको आग्रह गरे। सभापति थापाले मधेसका विभिन्न स्थानमा पुगेर जनसभालाई सम्बोधन गरेका थिए। सोही क्रममा उनले सप्तरीको हनुमान नगर, रुपनी र कदमचोक तथा सिराहाको लहान, जिरो माइल र गोलबजारमा आयोजित सभामा सहभागी भई कांग्रेसको पक्षमा जनसमर्थन जुटाउन अपिल गरेका थिए।