सिजन खबर २५ माघ राप्रपाका सहायक महामन्त्री सौरेन्द्र बहादुर शाहले पार्टी सञ्चालनको विधि र प्रक्रियाप्रति असन्तुष्टि जनाउँदै पदबाट राजीनामा दिएका छन् । उनले संवैधानिक राजतन्त्र र हिन्दु राष्ट्रको एजेन्डा संस्थागत गर्नुपर्ने बेला पार्टी नेतृत्व व्यक्तिगत स्वार्थमा अलमलिएको आरोप लगाए । आइतबार उनले पार्टीलाई राजीनामाबारे जानकारी गराइसकेको र सामाजिक सञ्जालमार्फत समेत सबै पद तथा सदस्यताबाट अलग भएको घोषणा गरेका छन् ।
सामाजिक सञ्जालमा उनले साढे तीन वर्षको सहकार्यका लागि नेता–कार्यकर्तालाई धन्यवाद दिँदै नेतृत्व तहको विरोधाभासपूर्ण चरित्रका कारण पार्टीमा आफ्नो स्थान बनाउन असम्भव भएको अनुभूति व्यक्त गरेका छन् । राष्ट्र र जनतालाई आफूले सबैभन्दा माथि राख्ने उल्लेख गर्दै उनले सधैँ देशको हितमा इमानदारीपूर्वक काम गर्ने प्रतिबद्धता जनाए । यसअघि केन्द्रीय सदस्य हिक्मतजंग कार्कीले पनि नेतृत्वप्रति असन्तुष्टि जनाउँदै पार्टी छाडेका थिए ।
