सिजन खबर-माघ २० राष्ट्रिय पारा तेक्वान्दो प्रशिक्षक कविराज नेगी लामालाई विश्व तेक्वान्दो महासंघले सन् २०२५ को ‘पारा तेक्वान्दो कोच अफ दि इयर’ अवार्ड प्रदान गरेको छ। विश्व तेक्वान्दोको प्राविधिक कमिशनको छनोट तथा सिफारिसमा उक्त सम्मान दिइएको हो। सन् २०१५ देखि नेपाल तेक्वान्दो संघको राष्ट्रिय पारा तेक्वान्दो टोलीका प्रशिक्षकका रूपमा कार्यरत लामाले नेपाली पारा तेक्वान्दोलाई अन्तर्राष्ट्रिय स्तरमा उल्लेखनीय सफलता दिलाएका छन्।
उनको प्रशिक्षणमा नेपालले विश्व पारा तेक्वान्दो ग्रान्ड प्रिक्स फाइनल (जी–१०) २०२२ मा स्वर्ण, हान्चौं एसियन पारा गेम्स २०२२ मा काष्य तथा पेरिस पारा ओलम्पिकमा ऐतिहासिक काष्य पदकसहित दर्जनभन्दा बढी अन्तर्राष्ट्रिय पदक जितेको छ, जसमा अधिकांश पदक पलेसा गोवर्धनले जितेकी हुन्। विश्व तेक्वान्दो महासंघले माघ १९ गते यूएईको फुजैराहमा आयोजित समारोहमा उनलाई सम्मान गरेको हो। यसअघि पनि उनले नेपाल ओलम्पिक कमिटी, राष्ट्रिय खेलकुद परिषद, बागमती प्रदेश सरकार र एनएफजेएफ पल्स स्पोर्ट्स अवार्डबाट उत्कृष्ट प्रशिक्षकका विभिन्न सम्मान प्राप्त गरिसकेका छन्।
