सिजन खबर-माघ १८ दाङको घोराहीस्थित राप्ती स्वास्थ्य विज्ञान प्रतिष्ठानमा क्यान्सर उपचार सेवा सुरु हुने भएको छ। यसका लागि प्रतिष्ठान र चितवनको भरतपुरस्थित बीपी कोइराला मेमोरियल क्यान्सर अस्पतालबीच आइतबार सम्झौता भएको हो। सम्झौतामा राप्ती स्वास्थ्य विज्ञान प्रतिष्ठानका निमित्त उपकुलपति तथा रजिस्ट्रार प्रा. श्याम लम्साल र क्यान्सर अस्पतालका कार्यकारी निर्देशक डा. शिवजी पौडेलले हस्ताक्षर गरेका छन्।
सहमति अनुसार क्यान्सर उपचारका लागि आवश्यक जनशक्ति आदानप्रदान हुनेछ। हालसम्म दाङमा विशिष्टीकृत क्यान्सर उपचार नहुँदा बिरामीहरू चितवन, काठमाडौँ वा भारत जान बाध्य थिए। सम्झौता कार्यान्वयनपछि साविक राप्ती अञ्चलसहित पश्चिम नेपालका नागरिकले आफ्नै क्षेत्रमा विशेषज्ञ क्यान्सर सेवा पाउने विश्वास गरिएको छ।
