सोमबार, माघ १२ राष्ट्रिय लिग २०८२ अन्तर्गत मनाङ मर्स्याङ क्लबले पहिलो जित हात पारेको छ। सोमबार भएको खेलमा मनाङले क्राकेविहार क्लबलाई ५–१ गोलले पराजित गर्यो। खेलको १६औं मिनेटमा सुरेश कुमालले मनाङका लागि पहिलो गोल गरे भने २०औं मिनेटमा क्राकेविहारका सन्दीप देउवाले बराबरी गोल फर्काएका थिए।
त्यसपछि मनाङले खेलमा पूर्ण नियन्त्रण जमायो। २५औं मिनेटमा अनिल कुमारले गोल गरे भने गिडेओनले ५४औं र ८५औं मिनेटमा दुई गोल थपे। नवराज गुरुङले ८०औं मिनेटमा अर्को गोल गरे। यो जितसँगै मनाङ लिगको १५औं स्थानमा उक्लिएको छ भने क्राकेविहार लगातार चार खेलमा पराजित भएको छ।
