ललितपुर बैशाख ११: उपप्रधानमन्त्री एवं शहरी विकास मन्त्री प्रकाशमान सिंहले जनतालाई सकारात्मक प्रभाव पार्ने प्रविधिमा ध्यान दिनुपर्नेमा जाेड दिनुभएकाे छ । बिहिबार सेन्टर फर डेमोक्रेटिक इञ्जिनियर्स एसाेसिसयसनले आयाेजना गरेकाे भविष्य निर्माणमा नवप्रवर्तन र दिगाे विकास विषयक राष्ट्रिय सम्मेलनकाे उद्घाटन गर्दै उहाँले यस्ताे बताउनुभएकाे हाे । उपप्रधानमन्त्री सिंहले राष्ट्रकाे आवश्यकता र समयकाे मागअनुसार विकास नीति अघि बढाउनुपर्ने धारणा राख्नुभयाे ।
नेपालका लागि काम लाग्ने इनाेभेससनमा जाेड दिनुपर्याे । आम नेपाली जनतालाई सकारात्मक प्रभाव पार्ने प्रविधि अघि बढाउँदा राम्राे हुन्छ, उहाँले भन्नुभयाे । उपप्रधानमन्त्री सिंहले विकासकाे काम अघि बढाउँदा दिगाे विकासमा ध्यान दिनुपर्नेमा जाेड दिनुभयाे ।
त्यस्तै, फरक सन्दर्भमा उहाँले वैशाख ११ गतेकाे नेपालकाे राजनीतिक इतिहासमा विशिष्ट महत्व रहेकाे बताउनुभयाे । केन्द्रीकृत शासन प्रणालीबाट संघियता र राजतन्त्रबाट गणतन्त्रमा जाने दिनका रूपमा वैशाख ११ काे विशेष महत्व रहेकाे भन्दै सिंहले लाेकतन्त्र दिवसकाे शुभकामना दिनुभयाे । उहाँले लाेकतन्त्र लामाे संघर्षबाट प्राप्त भएकाे भन्दै यसकाे महत्व बुझ्न आग्रह गर्नुभयाे । अहिले अधिकारकाे कुरामात्रै धेरै हुने गरेकाे भन्दै अधिकारसँगै आफ्नाे जिम्मेवारीमा पनि जाेड दिनुभयाे ।
